Analfabetoa
Analfabetoa
2019, poesia
88 orrialde
978-84-17051-29-7
Azaleko irudia: Asier Mendizabal
Azalaren diseinua: Lander Muñagorri
Iñigo Astiz
1985, Iruñea
 
2012, poesia
 

 

INIZIATUAK

 

 

Su-etena da

elurrak bailaran idazten duen mezua.

 

Garai batean

neguak ezinezko egiten zuen

ez heriotza,

baina bai eraginkortasuna,

eta eten egiten ziren gerrak

udaberrira arte.

 

Orain uda da

eta historia liburuetan soilik

jarraitzen dute

soldaduek

ilaratan pasatzen bailara honetatik.

 

Bost mende dira horretaz.

 

Izan dira gerra gehiago geroztik,

nahiz eta

ez duten denek gerra izendapenik izan,

eta ez da

apenas haien arrastorik geratzen lurrean.

 

Iniziatuek dakite oinazea irakurtzen.

 

Nekazariak

belarretan dabiltza lanean orain:

fardotan

biltzen dute zelaia bere baitarantz,

pleguz plegu,

hurrengo baterako

tolestutako mapa bat bailitzan.