GAUEKO TXANDA

Gaueko txanda amaituta

poligonotik etxera noa oinez.

Bide bazterretik, autoak

bizkor pasatzen dira, txistua

eta haize bolada arrastoan utziz.

Eguna argitzen hasia da,

goiz ekainaren erdialdean.

Eta orduan entzun ditut igelak.

Igelen kantua, ehunka, milaka igel.

Han behean errekaren ur ertzean.

Deika ari zaizkit igelak, deika.

Gaueko txanda amaituta

banoa beherantz.