Poesia kaiera
Aurkibidea
Sarrera. Koldo Izagirre
Herri honen erraietan (Zatiak)
laugarren oharra:
NEURE HERRIKO EUSKALTZALEAK
GUDULARIAK BADIRA MILATAN
NI BAINO AUSARTAGOAK
ETA IDAZLEAK MILATAN UGARIAGOAK
ETA POETAK MILATAN FINAGOAK...
BAINA
UTZ NAZAZUE
NEURE HARRITXOAK MARMOLAN PIKATZEN
NEURE HITZAK ELEAN ZORROZTEN
TITULURIK EZ DUEN HERRI HONEN MAILAN
FAMARIK EZ DUEN HERRI HONEN BARRUAN
OHORERIK EZ DUEN HERRI HONEN APALEAN
HIRUR EHUN MILA IPUI BERRI ASMATUAK
IZANEN EZ DIRENO
HERRI ZAHAR HONEN HEZUR-MAMIAK DANTZAN
ARIKO EZ DIRENO
TXISTUEN MUSIKA LIBRE ZORAGARRIAN... ETA
GEURE HERRI ZAHAR HONETAKO EMAKUMEAK
MANTELINA XURITAN ATERAIAK
IKUSIKO EZ DITUGUNO...
UTZ NAZAZUE
HIRUR EHUN MILA HARRI XURIZ
HIRUR EHUN MILA HITZ GOGORREZ
ZAPALDUADEN HERRI HAU
ALTXATZEN...
HIREKIN ETA HIRE LAGUN
GUDULARI BEILARIA...
Gauean berant jakin ondoan
hil lagun baten berria
hautsaren pean kukutu zuen
ikatz hondarkin gorria;
bi eskuz hartu mailu giderra
ta belauniko jarria
lapitz hotzean pikatu zuen
hamabosgarren harria!
Bihotz barruan oraindik dakar
heriotzaren dohaina:
hamabosteko hil-herri baten
izen lerroen labana!
Zori gaiztoak goizegi hartu
anaia gazte lerdena
asteri batez neguak hautsi
bere aitamen adina...
UTZ NAZAZUE
HIRUR EHUN MILA HARRI XURIZ
HIRUR EHUN MILA HITZ GOGORREZ
HERRI ZAHAR HONEN ERRAIETAKO
POESIA
LIBRATZEN...
UTZ NAZAZUE.
bosgarren oharra:
Ale hau galtzen baldin bada
nonbaiteko polizier baten eskuetan
edo suan sartua zentsore zital baten manuz
edo, beste gauza ezdeusen artean,
pubelagian suntsitzen baldin bada
ez dolu ukan
eta...
krima bat izan bazen...
barka
zeren
holako aleak
mila ta mila baitaude gordeak
harri xuriekin nahastekatuak
hitz gogorrez estekatuak
herri zahar honen erraietan.
GEUK NAHI BALDIN BADUGU:
Herri Batuen auzitegian
ez da sekula erranen...
Zapaltzaileen mintzaldietan
ez da agian entzunen...
Historiaren horri beltzetan
ez da nonbait idatziren:
Europa zahar honen lurretan
behin herri bat izan zen!
hola ziotean
Herri zahar honetako erraien barruan
gertatu eta juntatu zirenek
bizia pil-pil bere beroan eta garrasian
senditu eta hurrupatu zuten egun hartan...
Erabaki zitean eta
zin egin:
EZ DITEK ERRANEN
EZ DITEK ERRAN BEHARKO:
HERRI BAT IZAN ZEN!
ZIN EGIN-ETA GERO...
Kexu minean hasi zituan
zedarri-mugak gainditzen...
Lotsagabeko zapaltzaileen
indarkeriak ordaintzen...
Kartzela-herri bihurtu zuten
ate ustelak botatzen:
Tinkatu herri honen jendeak
has zitezen oldartzen...
LEHER EGITEN EZ BALDIN BADUGU...
Kalda gaitzean ari zituan
harri xuriak pikatzen...
Arnas kolpeka izerdi trenpan
euskara hitzak limatzen...
Burdin beltzaren golde gogorraz
lur lehortu hau iraultzen:
Herri agortu honen erraiak
has zitezen ernaltzen...
ORAINDIK INORK EZ DIK ERRANEN:
HERRI BAT IZAN ZEN!
GEURE HERRIAREN BORROKA, ERDI-MINAK
GEURE HERRIAREN BORROKA, ERDI-MINAK
GAUR
AITA-AMEN BIHOZKADAK, ZOTINAK, NIGARRAK
ANAIEN KARKAILAK, ABESTIAK, IRRINTZINAK
GAUR
HASTEN GAITUK KANTATZEN, DANTZATZEN
GUDULARIEKIN
EZIN ASPERTUZ, EZTI ALA AZKAR
POLLIKI ETA FINKI, POLLIKI ETA ARIN
ARITZEN GAITUK ORENAK ETA ORENAK
PLAZAZ-PLAZA
BIZI DEN HERRI HONEN IRAULTZA
HIRUR EHUN MILA HARRI XURIREN ARTEAN
MINTZATZEN
DANTZATZEN
ARIN-ARIN
AGERIAN
GAUR
HIRUR EHUN MILA HITZ GOGORREN
MUSIKA ZORAGARRIAN...
GAUR ETA GERORAKO
GAUR ETA BETIRAKO
UTZ GAITZAZUE LIBRE
HIRUR EHUN MILAKO JENDETZE HONENTZAT
HIRUR EHUN MILA HARRI XURIZ
HIRUR EHUN MILA HITZ GOGORREZ
HERRI ZAHAR HONEN ERRAIETATIK
POETA DEN HERRI ISILDU HONEN
IPUIA
SORTZEN...
GAUR ETA GERORAKO
GAUR ETA
BETIRAKO
GAUR ETA BETIRAKO
UTZ GAITZAZUE LIBRE
w 1974
