11. BATAILA.
Helikopteroak

 

(bagira eta liuda lurrean etzanda daude.)

 

liuda: Sugeek ez dute entzuten.

 

bagira: Nola?

 

liuda: Sugeak, ez dutela entzuten.

 

bagira: Eta hori?

 

liuda: Kakalardoek ere ez. Artropodoek oro har. Gorrak direla. Ez dutela ezer entzuten. Ez bonben zaratarik, ez tiroen hotsik.

 

bagira: Zapaldu duzu noizbait kakalardo bat?

 

liuda: Eta nork ez?

 

bagira: Eta entzun duzu oinpean hartzean egiten duen zarata hori?

 

liuda: Krak.

 

bagira: Horixe.

 

liuda: Bai.

 

bagira: Ba kakalardoak ez.

 

(Barre egin dute biek. Isiltasuna.)

 

bagira: Bero egiten du, ezta?

 

liuda: Baina ura hotz egongo da oraindik. Eta olatu erraldoi horiek…

 

bagira: Ez, lasai, nik ere ez dut bainatu nahi.

 

(Etena.)

 

bagira: Eta noiz esan duzu etorriko direla gure bila?

 

soldadu ezezaguna: Kartzela bat.

      Zenbat aldiz zapaldu duzue kartzela bat?

      Ba al dakizue kartzelek hondartzen antz handia daukatela?

            Kartzelan hormigoizko zoruak tap-tap egiten du patiotik paseatzen zarenean; hondartzako hareazko zoruak, ris-ris.

            Kartzelan klak-klak egiten du zaintzailearen giltzak burdinazko atearen kontra; eta firin-faran itsasertzeko haize leunak hondartzan.

            Zuentzat agian ez, baina kakalardoarentzat kartzelek hondartzen antza handia adaukate.

 

bagira: Seguru zaude hemen zela, ezta?

 

(Ziurtasun handirik gabeko keinu batekin erantzun dio liudak.)

 

bagira: Beharbada krema apur bat jarri beharko genuke. Erreko gara, bestela.

 

liuda: Palak ekarri dituzu? Jolastu gaitezke pixka bat itsasertzean.

 

soldadu ezezaguna: Kartzela bat.

      Helikopteroz bete da lau ertzetako zerua.

 

bagira: Uste duzu etorriko direla?

 

(Ziurtasun handirik gabeko keinu batekin erantzun dio liudak.)

 

bagira: Ezin dut gehiago.

 

liuda: Nik ere ez.

 

(Elkarri eskua emanda altxatu dira liuda eta bagira, eta badoaz.)

 

soldadu ezezaguna: Kartzela bat.

      Gehiago ezin duzunean heltzen da laguntza. Bizirautea lortu baduzu.

      Esku bat, helikopterora igoko zaituena.

      Esku bat, zurearen modukoa. Zurearen kolorekoa.

      Esku bat, zurea. Ez haiena.

      Eta gerratik aterako zaitu.

      Baina gerra ez da oraindik amaitu.

 

[Joan zaitez 14. batailara]