LIBRE IZATEA
(«Y» BELAUNALDIA)

Azken albisteekin begiratzen zaitut, ama.

«Nola esango dizut ni izan naitekeela hurrengoa?».

Zopa jaten dut eta saiatzen naiz

etxea memorian giltzapetzen: anaia bere kontuekin,

aita futboleko kronikak irakurtzen.

«Zer esango du egunkariak bihar nitaz?».

Ez naiz ikasle txarra, maite dut nire jendea.

Zuekin egindako gauzez gogoratzen naiz:

anaiarengatik egiten genituen auto bidaiez

eta umetan elkarrekin mendira joaten ginenekoaz.

«Nitaz lotsatuko zarete atean deitzen dutenean?».

Oheburuko irratia piztu eta galtzeko gauzak zenbatuz

zelatatzen ditut gaueko argiak.