URTARO BERRIAREN ETORRERA

Gauza bakoitzak bere denbora din

Eguzkiak ihartu egiten ditin teilatuak

haizeak huntza ez beste antzaldatzen din

Urtaro berria hire etxeraino iristen dun

baso erreak igarota

Han ernaltzen ditin haziak

irakurri ezin ditunan mezuak uzten ditin

eta berriz hasten eta hazten

Txori izateko hegalak falta zaizkion

baina erraz iragaten ditin haranak

migratzen din edo hibernatzen

lurralde berriak zeharkatzen ditin baina

etxean dun hiltzen

Esku artean eztanda egiten duen leherkaria dun

zikloka biziarazten gaituena

Ilargiarekin agertzen dena

eta pertsiana bota ahala ezkutatzen

Gauza bakoitzak bere denbora din

ez ezan neguan orbelik bil