ITZALEI ABESTEN

Laster hilko zarela esan didate

bihotza nekatu eta birikak desagertu zaizkizula

Ez zatozela gehiago

Hemen aulki bat sobera

aireak itoko ez dituen arrainak

eta tigreak barrenetatik orroka

Bizitza ez da denbora baino

eta hondartza bat desagertzen zaigunero

harriak birrintzen ditugu berregiteko

Lurra jaten dugu baina bazoaz bazoaz bazoaz

Badakigu bat gehiago faltako zaigula

zainak hoztu eta hezurrak gogortuko zaizkizula

bazoazela eta ez zatozela

hau ausentzien melodrama

bat gehiago dugula ehorzteko sinetsi ezina

Ez dakigu ez otoitzik ez irauteko erregurik

Ez dugu itxaropen apurrik biltzeko

Badakigu babesak non eraiki

baina zain gaude urak nondik iragango

lurrak ezin du gure mina iragazi

Orain badakigu eskuak non ipini

luiziak gelditzeko