ainaren hegaldi arinak dakuskit

arrats apal lasaietan.

oihuka has nitake baina ondikozko

hasperen gordeak oro higatzen

zaizkit gauaren mortuan.

esperatzerik badea?

laparreko elorria eskutan hartzen dut

geroaren mikatz dardaratiaz

herabeki betetzeko.

ainaren hegaldi arinak dakuskit.

negar gogoarekin irriz nahiz nago

ortzeak hondorik ez duelako.

esperatzerik badea?

ipular dudakorretan denbora pasatzeko

haragi puskak bortizki plegatuz

atzoko arpegi larderiatsuak

astiro arrakonposatzen ditut

ordea satorren egunerokotasunean

nehor ez duket ezagutzen.

esperatzerik badea?

haize hormatuak ur gosez dauden artadi

zabalak aspertzeraino laztantzen ditu

bihiak irinaz hustuz betirako.

lurrean etzanik amesten dut behineko

amodioaz sangreatzen nautela

eta hire gorputzaz asekaitz ibiltzen naun.

esperatzerik badea?

esperatzerik badea?

esperatzerik badea...