eguzki zurailak lantokia epeltzen du

pentsatzen nagoela

zelai kantarietan barna

ibiliko garela bihar

iraila jadanik goizeko zortziak aldera

heriotz susmoaren hotza asmatzen

saiatzen naizenean

bakearen hezean igeri noa

gosea dut desiratzen

odolez blai.

ahosabaietan azkenik hormatze krudelen

kalzioa lotzen da

hauste biharamon oroimenak

auzo ohia ehortzi genuen euripean

ahosabaietan azkenik hormatze krudelen

kalzioa lokazten.

galdu gaituzte aterberik gabeko oihanetan

argi izpirik ez genekusanean

zeru ilunetarik zetorren

sua haritzak kiskailtzera.

galdu gaituzte bihotzaren zoko hitsenetan

odolaren abiaduraz leherturik

karrika ezkinetan kukubilkatzen

ginen taupadak zenbatzeko.

galdu gaituzte eguneroko presaren dorpeaz.

uste genuen adiskidantzak balioko zuela

atzo-bihar-etzi-damu orotako

baina higatu zen aintzira motelen

leihorretan tematzen

eta arratsari begiratzen genion

esperantzaren zain.

kureleak pasatuko dira zeruan

neguaren seinale

eta subazterretan

kokatuko gara gaztainak janez.

kurelak pasatuko dira zeruan

urdinaren leizean

eta ahizparen irria ahantziko

dugu txorien hegadak behatzaz

ikusiren duzu eguna argitzen

artadi lainoa oro uhargitzen

ikusiren duzu gauaren hondoan

artizarra legun ilargi ondoan

ikusiren duzu ainaren hegalez

negua hurbiltzen euri gesalez

ikusiren duzu eskua zabaltzen

amodio minez haragian galtzen

ikusiren duzu indarrik badago

ortzaiz urratua gero zabalago

zainek abandonatzen zaituztenean ondikoz

ez duzu gehiago beleen dantza lasaia

itxuratzen ahal

gaizki

barur egunak zerrendan

diokezu baldin eta aurten haize hegoaren

eztia faltatzen bazait

hilgo naiz segur

gaizki

barur egunak zerrendan

soilik bakardadearen urratsak errautsean

maita edo maitatuak garela sinets dezakegu

hatz berdintsuak erregebideetan

asekaitz

maita edo maitatuak garela sinets dezakegu

-deituko zaitut...

-idatz iezadazu otoi!

jasankaitz

maita edo maitatuak garela sinets dezakegu

baina barbariaren aurka borrokatzeko

goiz nabarrean

bakar bakarrik gaude

harriaren pare.

otelore horien garaiaz gogoratzen naiz.

txirritak iratzeetan kantari.

aiheneko intzaurtzeen maldan iragaiten

genituen igandeak

herenegunak aipatzen.

izar ihintzak zein desiragarri

eskaintzen digun baratzeko

belarra

izar ihintzaren laztan bustiaz

ahurreratzen zaigu emeki

amodioaren lilia

izar ihintzak zimurturen ditia

mihiseak larruak sabelak

eta ezpainak

noiz ote du izarraren ihintzak

erreko maiteminaren

ankerra?

lisboatik karta bat ardietsi dut atzo

goizean eta saudade

guadelupeko eguzki sartzeen argazkia

bezperan baina

herriko ehortz mezak oro hutsegiten

ditut honaratuz geroztik

hurbiltzen ari dun askatasun nasaien orena

edo herio errautsen haizea

nola jakin?

Asia kutsua din auzo honek eta hire gutunaz

amets egin ninan barda

nola jakin?

bazkalduko gaitun elkarrekin

ibaiak kurutzatzen diren hirian

mortuetan zizelkatu ukamenak

ahoratuz

kristalaren zorrotza duten solasen erdian.

ainarak berriro bildu dira hegoruntz partitzeko

berriro bildu dira alabak eta amak

iparruntz abiatzeko orduan.

o ainara nerea...

sarri bilduko da berriro iparrarekin hegoa

oinazearen minean bihar kartsuagoen eraikitzeko.

oraina baizik ez izatera heldu beharko genuke

atzokoak nostalgia hazten duelako eta

etorria dudan dagolako munduaren inguruan.

oraina baizik orainaren biluzia estimatzeko

edo trenek hautatu duten geltokia

onhartzen ikasteko

maitatzeko dakigularik alta orainean ez

zaigula amodiorik bermatuko.

bihotza higatzen digu tristuraren zamak

urteak antzo gastatzen ditugu

etor litekeen berotasun

ikaratiaren zain.

nekez iratzartzen garen goiz bakoitzean

badakigu gero urrunago doala

ortzaiz garaituetako

mendi sardeskatuen lerroa.

ederra da bakardadea ederra da iraupena

tristuraren hedoiak lehertzen

ez diren artean

uharrik gabe ihardokitzen dugula

lur azalaren moduan

ur eskasez

arroilaz labantzen zaigu larrua

ur eskasez.

herrialde desolatuak zeharkatu genituen

izpirituaren erresumetan

desbideratu ginenean.

etxe hutsen loiroetan zaharrak mintzo

ziren iraganeko kolore loriosoez

esperantzak hautsi elasturiak

bisitari traketsen

begietan mailukatuz.

katu basak pikondoetan gerizatzen.

erreka ertzera jautsi ginen

negarren isuria astintzeko asmoz

eta atsedena aurkitu genuen legarretan

ezpataz grabaturik.

salbatuak ginena?

diot hitzaren oihartzuna desira dela

gaua kanalaren hegietan paseiatzen

pasatzen denean

hitzaren oihartzuna uraren azalean

oxigeno bihurtzen delakoan.

elearen oihartzuna desbestitzen dugu

bruma herresen xarmaz

gorputzak hunkitzen direnean

hitzaren oihartzuna lanbro malinaren

sakonean desiratzen baita.

beranduegi dun maitea loak hartzeko

zeruen arrosak ilusioa hazten duen

ordu minbera honetan eta urtxoak

teilatu hegietan amore grisak mokoz

zitzikatzen ari ditun maitea

beranduegi dun loak hartzeko.

garaizegi dun laztan suaz erretzeko

utz dezagun geroa itsasoraino

hedatzen euriaren ahuspean edo

haize hegoaren hatsaz gure bihotzak

gozatzen malkoaren ordez dedin

elurraren gutizia orotan zabal.

ura lehortu zenean haragiaren arkaitzetan

errearen usainaz jantzi ziren aireak

zoriontsu ginen ondarrean

ezpainak hauts eskuak hauts

munduaren ankerra hauts

mineral bihikatu genituen haizeak

desertuetako isiltasunetan barreiatzeko

ura lehortu zenean haragiaren arkaitzetan

errauts nintzelarik sekulako