berriz loratuko dira desertuak

urak atzera egin eta zerurantz isuriko da

ur-jauziak izartegian itsasoratuz

sugeak begiak itxiko ditu

eta berriz ireki

otso batek eguzkia

irensten duen bitartean

etxeak glaziarrak gailur urdin

eta izaki guztiak

itsasoan hondoratuko dira

eta berriz loratuko dira desertuak

uraren azpian edo gainean

lurrikara edo sumendi batek abesti batek

irla berri bat konjuratzen duenean

berriz berdatuko dira gure barnean

dardaratzen diren zelaiak eta aintzirak

eta urki zuriek islandiako lautadak

estaliko dituzte urki zurien sustraiek

baso bat berpiztuko dute

lurraren eta izotzaren azpian

onddoen mizelioa magmarekin

betiko

korapilatuta