Zaramalogia

                    «Kosmos delakoa, edozelan pilaturiko

                    zarama besterik ez da»

Heraklito Iluna

Zazpi zaborrontzi kale bazterrean

                          (zazpiak lerroz lerro)

taparik gabe, ahoa euliei zabal zabalik,

                                    tripazain.

Auzo honetako andere gizonek ontziak

                      arretaz betetzen dituzte.

Hara hor gure soziologia material

                      eta sakonaren hondarrak,

boltsa astunetan edonondik eta

                        edonoiz datozen hondakin

enigmatikoak. Begira egiezu gorputz hutsoi,

                            zelan asebetetzen diren,

eta egin hiritarren behar intimoen

hitstoria.

Zarama ontziotan denetik, bizimodua

                          eta bere soberakinak,

antropologia artxiboan baino humanitateari

                          buruzko datu gehiago.

Hara hor botila hutsak, plastikoak

                                  eta txatarrak,

saxofoi herdoildua, botika kadukatuak,

                          kaiola txori hilak,

zaramapean metano gas lehergarri bihurtuko

                    diren sein-painal desetxableak.

Zazpi zaborrontzi kale bazterrean

                          (zazpiak lerro-lerro).

Igarri metalezko ahoen mezua: ugarian

            eta naharoan akabatuko gara,

dietak egin beharko ditugu gainbizitzeko

                                      alde honetakoek,

bestaldekoak gosez egarriz eta euliz

                              hiltzen diren bitartean.

Hara hor katu beltza zarama gainean

                      eta heldu den agurea,

agure gaixo hori bidaiaren bat egiteko

                        oinetakoen xerka agian.

Zazpi zaborrontzi irensle kale bazterrean

                        (zazpiak lerro-lerro)

etorkizuneko estetika, joankizuneko etika

      zibilizazioaren poetika formulatzen,

bota eta tirante fosforezenteekin datozen

                        langile beilegien zain,

astiro eta astun materia birrinduz heldu den

                                  kamioiaren zain.

w1991