Aspaldian utzitako zelda

                                ...et je n'entendrai plus

                                les verrous se fermer sur

                                l'éternel reclus

  Alfred de Vigny

Jakin nahi nuke nork betetzen duen orain

                                            nik utzitako zelda.

Ea entelegatzen duen hormako izkribu tipia:

                                        «eroria burrukara»

Ea alboko zeldatik inork hots egiten dion

          komuneko plastikozko tuberia soltatuz

                                telefonoz bezala mintzatzeko.

Ea hango egunak eternal dirauen, gauak izotzezko,

                      egunsentiak esne garratza diren.

Ea errekuentoan mirilatik soegiten duen begiak

(surveillir et punir)

inor ikusten duen edo iadanik inor ere ez

                                        (denak ala inor ez).

Jakin nahi nuke ihes egin genuenok

                                benetan ihes egin genuen

ala ihes egitearena zelda hartan jarraitzeko

                                  atxakia hutsa izan zen.

w1991