gau purpuran etzana

materia argitsuz egindako gizona

bularreko kaiola zaintsutik ihes egin dio

hortzetan ekarritako piztiak

egunen joanak  —udaberriko eromena

non emakumeak aieneka ari diren eta

bakarkakoak egiten dituzten haurren hezurrekin

gero

goizeko aluminioak urratzen du gauaren azala

ikusten dugu

gelan itxia gizon sukarduna —goratzen da

bere oroimenetik eta pizten du gertakarien

sua —aditzen da

txori bat nerbioak mokokatzen eta airea

odol putzuz da betetzen

gizonak altxatzen du azkenean burua min

barrenetik —miatzen du aho ondoan

dardaratzen eta itzaltzen den mundua