BIHAR EZ DAKIT ZER EZ DUDAN JAKINGO

                        Ama hil zaigu lanak itota.

                                              J.A. Artze

Gure amak ez daki nor den Walt Whitman

kapitain baten hilotza maitatu zuen arren.

Ez du Victor Hugo inoiz irakurri,

Jean Valjean, Fantine eta Monsieur Madeleine

ametsetan agertu izan zaizkion arren.

Ez daki nor diren Faulkner, Jelinek edo Carver

nahiz eta maleta zahar batean hilobiratu zituen

denei hautsa maitekiro kendu ostean.

Gure ama pianotzat hartu izan dute

inoiz Bachek, Mozartek, Ellingtonek.

Haren begi elurtuetan odol tanta bat da

Malevitxen etxe gorria.

Gerriko minez dabil aspaldian

eta hala ere etxeko lanak amaitu eta

kalera ateratzen da egunero izebarekin

eguzkia, hotza zein beroa, hartzera.

Gure amak, paperezko deiak egiten

etxean utzi duen alabari,

bizitza zertarako den jakitera iritsi gabe

hilko direla biak ala biak

azaltzen jakin nahi luke.