EZTANDAK BESTERIK

Bekiko zimur bakoitza,

trintxera bat.

Guztietan hil naiz

inoiz.

Aurpegia guda-zelai,

begietara tirokatu

ohi naute inoren begiradek,

piztienak bailitzan

dardararaziz neure sudurtzuloak

amorruzko odol beltzaren usainketan.

Hara ezpain ertzetako zimurdurok

lats aunitzen ubide lehor,

zeintzuetan

lerde eta adur jarioak

isuri izan bait dira

malko gezaltsuetan

nahasiak.

Eztandak

besterik ez dantzute

ene belarriok.