GEOGRAFIA

Norbanakoaren posizioaren menpe

Gauzak, objektuak, gisa ezberdinean

Antolatzen dira. Ordenak ez du inoiz

Seme bikirik erditzen, eta higidurak

Ez du zinez iturri finkorik. Puntu bat,

Koordenada geografiko jakin bat.

Ezinbestean amiltzen da mundua bere

Baitan, nostalgiarik, garai hobeen mirarik

Edukitzeko aukerarik gabe. Luis de

Gongorak esan zuen behin, hordituta,

Jaiotza eta patua heriotzaren modalitate bi

Baino ez direla, eta Juan Ramon Jimenezek

Erantzun zion gero: Ezin da dena aurreikusi

Luis, ezin da. Balkoiko emakumeak erabat

Biratu du bere burua adibidez, aurrezki

Kutxako eskaleak, unibertsitatean pasa

Du gaua. Tren estazioa hamar zentimetro

Mugitu da ekialdera osteguneko lurrikararen

Ondorioz baina «ez dago arduratzeko

Motiborik», esan dute ingeniariek seguru,

«Lurrikarak mendiak mugitzeko gai

Dira». Beraiek ere, fakultate garaitik

Iragandako denbora kontatu dute eta

Galdu egin dute arnas apur bat. Euren

Amiltzea, izan ere, tristea baita.

Frantsesek, guztiarekin, aurrera egiten

Dute, automobilak ekoitzi, banderak

Eroan, doxa eta epistemea zedarritu,

Harrotasuna mantendu lotsarik gabe,

Eta abar. Bi bider zenbatuta ere, fisikaren

Legeek ez dute etsiko eta maitaleek tipi-tapa

Pasioan jarraituko dute baratze zainduetatik,

Itsasertzeko kale garbietatik. Horregatik da,

Pentsatu du Mariak, alferrikakoa.