ZENBAIT KOLORE

«Izana» letra etzanez idazten da, «gogoa» gako

Artean, «hizkuntza» letra lodiz. Dirudiena baino

Errazagoa da; logika apur bat, zuhurtzia, mailu bat,

Besarkadak eta musuak. Gran de Gracia-n sirena

Hots ezezagun bat entzun da kausa-efektuaren

Aldekoen zoritxarrerako. Iritsiko dira gabezia

Garaiak, hondamendi konponezinak, bigarren

Mailako alaitasun zurrunak, eta ni zubien gainetik

Igarotzen naizenean, «barkatu» edo «agian» esango

Dut. Ez dut gehiago galdetuko. Horrela, hitzek

Ulertuko naute, ez duzu azalpen berririk behar

Izango. Eta orain topografo batzuk aldaparen

Pendiza kalkulatzen ari dira, bart gauean aldatu izan

Balitz bezala. Miquelek ezkor jarraitzen du baina,

Hala ere, berak ordaindu du dena. Rubik-en kubo

Bat oparitu diote eta nik nahastu dizkiot koloreak.

Rubik gako artean idatzi beharko ote da? Esan ezazu

Zerbait. Esaldi arrunt bat sikiera. Irten egin naiz, hiri

Honetan sekula egon ez banintz lez. Euren hizkuntza

Ulertzen dut, bai, baina ez euren ibiltzeko modu

Estraño hori. Eta, gaur, bi eurotan saltzen dute

Laranja kiloa supermerkatuan. Prostitutek, bestalde,

Eurenean jarraitzen dute, «prostituta» nola idatzi

Behar den axola gabe, edo arrazoia armairu (handi

Edo txiki) batean sartuko bailitzan. Miquelen auto

Berria urdina ei da, eta ekologikoa, ez duela

Kutsatzen ia. Eta Silviak katua (bost urte) saldu du,

Asaldatuta, egunkarietan iragarki horiek ikusi

Dituenean. Horregatik ez du zaintzen sobera bere

Itxura, bere jantziak, eta ez da apenas apaintzen jada.

Zer egin genezake? Norberaren alde egitea zilegi

Bada, ez zaigu sobera geratzen; distantzia jakin bat,

Abiadura zentzudun batean aurrera egin beharra,

Ahal bada. Horrela, dantzatzen ahalko duzu

Loturarik gabe, libre. Nik alde egingo dut, beste

Leku batzuetara; ezin esan nora, nola. Hitzak zama

Handi bat izango dira han ere.