PUTZU GUZTIEK DUTE HONDOAN APOA

Parisko jauregiek behar dute Sena

Versallesko putzuek bezala apoa

Komunako iraultzan gorri izan zena

okerka dabil orain herren du zangoa

Luisianako lurretan dator Mississippi

ibai hori begitik sortu du apoak

zuri ez delako ta badelako ttipi

Kukluxklanen bisita dauka gizajoak

Kazan hiritik zabal pasatzen da Volga

popeak agurtu du ostikoz apoa

kosako zuri denak daitezela olga

pikutara joan da sobieten aroa

        ai mundua betea ez balego apoz

        nork emanen lioke bizitza honi poz?

        penak uxatzen ditut eskusoinua joz

        nahiago baitut bizi ahuspez baino hauspoz!

Lisboako zubiak edertzen du Tejo

Pessoa lagun zaharra bildu du apoak

tabernara kantari zabuka dute jo

poetarik onena ontzen du ardoak

London aberasteko dago Tamesia

ate denetan jo du lan-eske apoak

Robin Hoodek aspaldi hautsi du gezia

orain beste beso bat behar du arkoak

Al Kairo zikin hartan isurtzen da Nilo

Alaren urrikia otoi du apoak

pobre sortu den horrek inon ez du giro

bihar lehertuko ahal du Aliren autoak

        ai mundua betea ez balego apoz

        nork emanen lioke bizitza honi poz?

        penak uxatzen ditut eskusoinua joz

        nahiago baitut bizi ahuspez baino hauspoz!

Buenos Airesen bada Rio de la Plata

bazter hartatik dago oihuka apoa

ura badauka baina zilarra du falta

Piazzolak bezain triste jotzen du tangoa

Baionan itsasora zabalik Aturri

hemen ere bizitzen lan dauka apoak

egalitatez labur libertatez urri

ez baitira zilegi hark dauzkan asmoak

Amazonas Danubio Ganges Po Zanbezen

mundutxo hau denean oso txarto doa

baina ez dezagun gal esperantza ezen

putzu guztiek dute hondoan apoa

        ai mundua betea ez balego apoz

        nork emanen lioke bizitza honi poz?

        penak uxatzen ditut eskusoinua joz

        nahiago baitut bizi ahuspez baino hauspoz!

    1998

    Musika: Joseba Tapia