EZ DA EZINBESTEKOA

Ez da ezinbestekoa

ilargi betea eta izarren ederra.

Ez da ezinbestekoa

deitzen ez duten lagunen agenda,

borroka armatua, arrazoia izatea,

gezurrik ez diozula zin egitea.

Ez da ezinbestekoa

erbestea, idazlea, itsasoaren metafora,

berrogei lapurren kondaira.

Ez da ezinbestekoa

eguzkia, andere biluzia hormaren gainean,

egunen destaina, non dagoen askatasuna,

bakea gorbatetan estutzea

ez da ezinbestekoa.