Noizbehinka

abakoak ezagutuko ez bagenitu bezala

biderkaketa taula ahazkorraren moduan

bateko eta besteko

hildakoen zerrenda berritzen digute arbelean

ahaztua ez baina

kontzientziaren alde ketsuenera baztertua

behar genukeen hezur anabasa zimela

noizbehinka

denbora neurtzen duen klepsidrari

milaka akurik aterpeetako

malkoek eragiten diotela oraindik

noizbehinka bakarrik

baina maizegi da noizbehinka

ispilu izan nahi luketen patio leihoetan

egunkarietako egia atzamarrez seinalatuz

berdina omen delako odolaren beltza oro

espaloietako demokraziara estutzean

Noizbehinka

harlauzetan isurtzekotan

odola baino gustokoagoa dugula garagardoa

eta zure bihotza

hotzari erantzuten ez dion telefono gorria

ardotan bustitako musuzapia baino ez dela

gauez zaila baita browning bat colt batetik

bereiztea

urkatzen zaituen sokaren kolorea

Noizbehinka

borondate apur batez

hiltzen ikastea erraza dela

malkoek ito dituztela herri osagabeen

osagabe erien oihu ohiak

odol errekek eragiten dutela oraindik heriotza

neurtzen duen klepsidra laiotza

eta amapola guztiak blaitzen dituztela

itsas biriketan ito diren mariñelen begiek

norbera bere heriotzara ohitzen hasterako

Noizbehinka

odola lehortzen denean

lokatzetik bereiztea zaila delako

kale aukeratuetan zaila kale egitea eta

zure bihotza ere

musuzapi odoldua da eztulka

bala arrazionalaren zain