Isiltasunaren bastidoreetan

Igitaiak ezpain-txunku margotuetan

Gaur ez dago inor isiltasunaren bastidoreetan

eta ate eroriek ukatzen dituzte etxekalteetako begiak

Gaur ezeztapen bat da etorkizuna

kafearen kondarra hondoan zuen kikera

ez da zainetan odol gehiegi zuelako lehertu

gaur inor ez da ausartzen zifra bat botatzera

Ez dago zehatz jakiterik goizeko zenbaketara arte

Iturri ofizialetatik gerezi ura baino ez dator

dena joango ote da erretena legez gaur

ez ote dira klandestinoak suaren etenak?

Beha daude teilaturik gabeko leihotik

torax geletako kaioletatik

Ez dago zehatz jakiterik goizeko zenbaketara arte

Auskalo zenbat aingeru

gillotinatu dituzten bart

Sotanadun nimiñoak bailiran ubidean

ihesi doazen iñurri mehatxatuek ez dute ulertzen

sufragio unibertsalaz

Ez ez da kea ibaiak dakarren hura

Gaur umeak dabiltza hildakoen zapatei lokarriak kentzen

Zerua gorri dago infernuz tiñaturik