Hazten

ikusi gintuzten

 

parajeak eta karrikak

 

iragaiterik

izanen ez ditugun bideen

 

oroimena bezala

lausotzen doaz.

 

Dena doa

lurruntzen.

 

Memoriaren

adar okertuak

 

gainera erori zitzaizkigun.

 

Sasiek ez al dute

dena estaltzen?

 

Maindirepean salbu

sentitzen zinen?

 

Denborak dena

astindu du.

 

Elkartzen gineneko

harkaitz hura

 

herrirainoko biderik

laburrena

 

haurtzaroko ezkutalekuak.

 

Izan ginen horretan guztian

amarratzerik ez badugu

 

nola estutuko dugu

hurrengo korapiloa?