Inora ez daraman pentsamendu laino hartatik kopilotuaren asientoan botata nuen telefonoaren argiak atera ninduen.

      Dentista irakurri nuen. Dentistarenean zita hartu beharra neukan.

      Ez nekien gau bat edo bi pasatu behar izango nituen beste etxean.

      Badaezpada ere, eta gorputzeko atal desberdinak erabilarazteko, buruan gorde behar nuena eskuan eramatea erabaki nuen, eta semaforo bateko itxaronaldia probestu nuen boligrafo bat bilatu eta ezkerreko eskuan dent. narras bat idazteko.

      Banituen lanak dentistarenean. Hiru egun lehenago, intxaurrak jaten ari nintzela, hagina hautsi eta zati bat erori zitzaidan.

      Bizitzan beste egoera batzuetarako ere subjektibitatearen irakasgai beharko luke mingain puntarekin hagineko zuloa aurkitzean sentitzen den zulo abismalaren eta eskuan ikusten duzunaren arteko ekuazio erratuak.

      Lo nagoela haginak lauskitzen ditudala esan dit dentistak.

      Hirugarren hortzarora iritsi naiz, behin betikora: titanio eta zeramikazkora.

      Gaixotasun isila deitzen dio medikuntzak bruxismoari. Barru jana, inplosioa.

inplosio: iz. (Fis., Astron.): Barruranzko presioa kanporantz egindakoa baino handiagoa denean, barrutik lehertzeko ekintzari deitzen zaio. // Astro baten bat-bateko uzkurtzeari dagokion fenomeno kosmikoa.