ERBESTERATUA

 

 

Laskuri

 

 

           I

 

Gela bat zara

neure baitara naramana.

 

Hiru pareta:

gotelea,

laugarrena:

beiratea.

 

Lurrak oihu egiten du

zapaldua den bakoitzean.

 

Krax-krax. Arrakalak.

 

Liburu klasikoak apalategian

eta bi aulki.

Mahai borobila

eta bi kikara

eta bi poto mahai gainean:

tea eta azukrea.

 

Lastima da

kafea maiteago dudala;

bestela, nire gelarik maiteena

zinateke.

 

 

           II

 

Norbere gelaren beharrezkotasunaz

mintzo zitzaigun Woolf.

Atea itxi ahal izatearen plazeraz,

intimitateaz,

bakardadeaz.

 

Itxarongela zuria.

Mesias profanoaren zain

erdiminez

luze egoteko.

 

Ohea ezinegonekin

partekatzen duenak

gela bat behar du;

liburuen gainean

kikarak pausatzeagatik

oldartuko ez zaion

abagune fisikoa.

 

Nire gela hori

izan zintezkeen.

Baina zera falta,

kafea;

 

kafetera italiar bat

txistuka.