AKATSAK

 

 

Mundu guztiak egiten duena

Zuk baino egin ez zenuena

Ez aipatu ez esan ezin daitekeena

Besteek egin eta zuk isilean

                                          daramazuna

Sudurki lizuna

                        mahaipean nola

                                                  hurkoari erantsi

                                                  diozuna

Denok batera egin duguna

Aitortu ez arren bakarka egiten duguna

Kastako akatsa

Lasta den akatsa

Basta den akatsa

Hashtag akatsa

 

Militarra

               bitarra

                          balistikoa

                                          artistikoa

 

Ausarkeriarena

Koldarkeriarena

 

Errimarik gabeko kopla

Edan behar ez zenuen kopa

Pentsatu bai, baina ez opa

Pentsatu bai, baina zertan kolpa?

 

Zigilatu gabeko teila

Egin ez zenuen beila

(Deituiozu Iñaki, deituiozu Sheila)

 

Biologikoa

Etxekoa

Bion logikatik apartekoa

 

Estrategikoa sentimentala politikoa profesionala

 

Seme-alabak izatea

Seme-alabarik ez izatea

Adoptatzea

postura bat

 

Gertuegi geratzea urrunegi joatea

Aski ez edo gehiegi

                              laztantzea latz

                                                     izan liteke akats?

 

Egin ez arren ongi geratzeko

soilik aitortzen duguna

Truka dezakezuna

(berriro truka dezakezuna)

                                                     (eta hemen berriro)

 

Atezainaren kantada

Makinistaren irristada

Pilotuaren lo-susta

Lerro umezurtza

Ejertzitoaren funtsa

 

Euskadi, zero akats

 

Akatsa halaber

garbi ez zegoena garbi ez uztea

Garbiegi zegoena berrestea

Bestaldera begiratzea

Begietara begiratzea (zakurrei, nonbait)

Termostatoarekin pasatzea

Garagardo garestia izozkailuan ahaztea

Kalkulu akatsa

Kalkuluak hatsa

 

(Argazkian)  gaizki ematea

(Bueltak)    gaizki ematea

Uretara tripaz jauzi egitea

 

Aritmetikoa eta lo arin eta betikoa

 

Gozatu nuena zenuena sufriarazi geniona ziguna

 

Error 404 not found

 

Tipografikoa biografikoa bibliografikoa

Areto hartara sartu izana

Perfekzioaren narda

 

Gertaeren lekuko ziur / ustezko egile izanik

                                                              deklaratzean

oker egindakoa

                                   jakinaren gainean

                                   ezjakinaren azpian

 

Bi taila handiagoa ez erostea jakinik

                                       goizetik gauera hazten direla

Bufanda uztea itzuliko ez zaren

leku laiotz batean

Eguzkitako kremarik ez jartzea

(ene, ezta aftersuna ere)

 

Tabakoa ez uztea

Zartakoa, ezustea

 

Akats izanik ekibokazio ez direnak

 

Gizartearen _________________

Kontatu ez zenuen _________________

 

Ahapaldia ahaztu eta leloa errepikatzea

(life, oh life!)

Harridura ikur batekin dena izorratzea

Puntu etenekin poema bat amaitzea

 

On-off sistemak giza haragian

                                           funtziona

                                                       dezakeela sinestea

 

Pentsatzea beti “hau, ez bestea” / “hau ez, bestea”

                                                  (hautatu behar nuen)

 

Makatza

Arkatza

Berakatza

Ortografia akatza

Gorde izana

Ez ezabatu izana

 

Mihi puntan instalatua

et

en

gabea

 

Seriean fabrikatua vs. akats artisaua

 

Hutsegitea

Hutsean enbasatua, korporatiboa

 

Akatsak, etab.

 

           — hitz jokoetan galtzea

           — errimatzea eta ez errimatzea

           — zerrenda gehiegi luzatzea

 

Dena azaltzen

                               eta

                                                      edo

                                         ala

                                                      baina

—baina den-dena—

azaleratzen duena

 

Onartzeko prest zaudena

Ez zenukeena sekula onartuko

 

Akats ederra eta akatsik ederrena

(batak ez du bestea kentzen)

 

Ustekabekoa nekeak eragina

Akatsen jopua akatsen erregina

 

Kasik egina

 

Nahita ere behin baino egin ezin dena

Nahita ere behin baino ezin egin

                                                    zena

 

Berriro egin nahi zenukeena

 

Behin eta berriro egin nahi zenukeena.