ZINEMAN FUNTZIONATZEN DUTEN GAUZAK

 

 

Zineman funtzionatzen dute:

Inurri domadoreek

Kristal lurrundu batek dutxan

Kristal esmerilatuak edonon

Enkajeko lentzeriak

Korrika datorren moja batek

Esku-pilotan dabilen apaizak

 

Zineman funtzionatzen dute:

Txistu egiten duten gazteek

Zurrunga egiten duen agureak

Autobusean eztei-jantzian doan emakumeak

Sokasaltoak

Josephine Bakerrek

Autoen kristal gainera isurtzen diren zuhaitzek

 

Zineman funtzionatzen dute:

Igitaiak emakume baten eskuan

Takoidun zapatak gizonezko baten eskuan

Laban batek ume baten eskuan

Bi zilbor dituen haurrak

Hortz bakarra daukan eskaleak

Itsuen bastoiek

 

Zineman funtzionatzen dute:

Ogi txigortuegiak

Ogi txigortuegiaren gainean

gurinak egiten duen hotsak

Hilobi batera gauez sartzen den nerabeak

Haur batek zabortegi batean

Ahate-pasak

Izter zuriek udan

 

Zineman funtzionatzen dute:

Dena dakiten zakurrek

Ezer ez dakiten gizagaixoek

Desio bat norbaitek piztu

eta beste norbaitek asetzeak

Xantaiak

Zartailu batek

Lehenbizi kolpekatu eta gero galdetzeak

(“Primero lo quebramos, luego lo averiguamos”)

 

Zineman funtzionatzen dute:

Eskailera zabalegiek

Eskailera estuegiek

Igogailua jartzeko zuloak,

pikatuan eta kontrapikatuan

Armairu handiek

Semaforo eta farola desenfokatuek

Enborrak aizkoraz mozteak

 

Zineman funtzionatzen dute:

Gabardinek eta bikiniek

Nasan korrika joan eta trena azken unean hartzeak

Markesina hutsek, gauez

Zaldiek, beti

(mexikarren westernetan txaparroagoak izan arren)

Akerren burezurrek basamortuan

Durangoko eskorpioi pozoitsuek

 

Zineman funtzionatzen dute:

Era guztietako protesiek

Tiradun kamiseta zuriek

Zigarroek, puruek baino hobeto

(aireplanoek, hegazkin handiek baino hobeto)

Animalien zintzarriek

Elizako kanpaiek

Errekaren zurrumurruak

 

Zineman funtzionatzen dute:

Kaioen txilioek (protagonistek larrua jo ondoren)

Jatetxe, saloon eta kirofanoetako ate bikoitzek

Suaren inguruan mantaz bilduta hitz egiten dutenek

Erle bati bizitza barkatu ondoren

urkatzen diren pertsonaiek

Legenardunek

Karta jokoek (nahiz guk ez jakin jokatzen)

 

Zineman funtzionatzen dute:

Sineskeriak (hiru zakurrek zaunka egiteak

ume bat hilko dela esan nahi du)

Arto-oskolez betetako koltxoi batek

Lurrean lo egiten duten pertsonaiek

Gominak

Ile bustiak

Adar batetik zintzilik dagoen arrosario batek

 

Zineman funtzionatzen dute:

Metro bagoietako jende pilaketek

Bulegoko atetik izena espatulaz ezabatzeak

Estoreak itxi eta zirrikitutik begiratzeak

Burdindegi batean edozer erosten duen norbaitek

Basurdeentzako zepoek

Basurdeentzako zepoetan harrapatuta

geratzen diren iheslariek

 

Zineman funtzionatzen dute:

Ondo ahoskatzen ez duten aktoreek

(gidoia txarra denean)

Ondo ahoskatzen duten aktoreek

(gidoia ona denean)

Cuernavaca, San Jose Purua eta Cuautlako errebalek

Via Tuscolanako Cinecitta estudioek

Fontana di Trevik

Churubuscoko estudioetan grabatutako safari batek

 

Zineman funtzionatzen dute:

Zuhaitz baten enborrari lotutako edonork

Binilo batek, jiraka

Ura edan ondoren

“ze ona dagoen gerezi likore hau” esateak

Neskamearen esamesek

Zuringo handia duten begiek

Proiektorean harrapatuta geratu den ileak