LA MAUVAISE CONSCIENCE

 

 

Atseginen baratze bat telebistan.

Bosch bera ere zurbilduko litzateke ikusita.

Lemuriako fantasmak metropolietan batzartu dira:

merkatuen logikak sorkari itxurgak

botatzen ditu mundura.

 

Ganbaran zentauro zauritu bat

besterik ez zaigu geratzen,

ezein balentria gauzatzeko ezgauza.

Baletor norbait jaikitzen laguntzeko, oihukatzeko

etsimena baino oldartsuagoa dela gogoa.

 

Carpe diem gasezko batean disolbatzen ditugu

pinpilinpauxa-diseinuak eta suge-azalen mudak

ideal usatuen herabez,

ahosabaia umezaroko mistelak eta masustek

eta mana magikoak hartuta.

 

Hautsa gara eta hauts bihurtuko gara;

bi ezerezen arteko txinpartak, E.ren esanetan;

zabor digitalezko zorroak,

bizkarra makur aurpegia ikus ez diezagun

behatxulotik so dugun kartzelazainak.