PANDORA DA ERRUDUNA

 

 

Pandora da erruduna.

Zorigaiztoa askatu zuen mundura

futbol-zelaira baloia bezala

edo azeria oilategira.

 

Zenbat itxaron zuen kutxa ireki orduko?

Zerk bultzatu zuen: jakin-minak ala

autoestimuaren mugan kukutzen den oldarrak?

 

Hilkorren irudira buztin-urez taxutuari

agindu adierraza eman zioten: “Ez ireki”.

(Ebari bezala: “Ez jan”).

Eta bistan da

zitalkeria giza arimaz jabetzen hasten dela

emakume batek desobeditzearekin batera.

 

Berak abiarazi zuen atzerakontua.

Hari zor diogu gaitzekin bizitzen ikasi beharra.

 

Gaitzek forma ugari izan ditzakete.

Adituen zeregina da horien zirriztuak deskribatzea.

Besteak beste, nire ekarrialdi poetikoarena.

 

Pandora, ez ezazu begiratu beste aldera.

Izorratuta gaude.

Eta ez daukagu aringarririk zure minduran.