Etxean igeri egitea

ez da kontu erraza.

Ez du edonork lortzen.

Nahiz eta ur moteletan saiatu

nahiz eta burua uretatik kanpo atera.

Etxean igeri egiteko etxea izan behar da lehendabizi

norbere urak eta norbere itomenak.

Hizkuntza baten barruan igeri egitea

ez da kontu erraza.

Nahiz eta oritza izan

nahiz eta haren sabeletik ernatu.

Urruneko ezpainetan murgil zaitezke

tximeleta estiloan hegaz zabiltzala sinetsi

zureak ez diren listuz ase.

Inoren barruan igeri egitea

ez da kontu erraza.

Nahiz eta gorputzok ura izan

nahiz eta itzulerako bidea aldatu ez.

Nork ez dio beldur inoren zainetako ur zikina dastatzeari

hoditerien kantua entzuten jartzeari?

Norbere barnean igeri egitea

ez da kontu erraza.

Nahiz eta azala irauliz biluzik murgildu

nahiz eta botatako urak edan.

Ezpainak itxita ere barruraino sartzen da

norbere uretan begiak zabaltzeko beldurra.