Goiz arrunt bat zen.

Harri konkor bat igarri nuen bizkarrean.

Hasieran ez nion garrantzirik eman.

Egunak joan ziren bizkarra

sahats baten setaz

makurtzen zihoala ohartu nintzen arte.

Besoak luzatu nituen atzerantz tentuz

haztamuka

korridore ilun batean oinez doana lez.

Zutabe sendo bana eskapuletan

egonarria sorbaldan

harrizko hormak eta

beirarik gabeko leiho bakan batzuk.

Molusku bilakatu nintzen

bizilekua gainean zeraman animalia irristakorra.

Herrestan jarraitu nuen aurrerantz

oskolezko etxe hari egin nintzaion.

Eta beste leiho bat zabaldu nuen

euria egiten zuenean begira jartzeko.