MUGA

Etxera itzultzeko bidean

topatu zaitut,

espaloi berean

Ihesa irakurri dizut

kalea fosildua zaizun

azazkaletako ugerrean

Jende eredugarriarena egin dut:

diruzorroko xeheetan

txanponik handiena apartatu,

tetrabrikezko kutxatxora bota,

leun,

zure aurrean belaunikatuz,

irribarrea eskainiz

Ihes egin dizut, ordea:

arnasari eutsi diot

aldendu naizen arte

larrumintzeko tolesetan pilatuta

igarri dizudan

izerdiodoltxizakakalistuzorneen

hatsarekin okatzeko beldurrez

Hankartea uzkurtu

eta goizean orbangabe jantzitako

kulero zurien ferekan

bilatu dut antidotoa

Ihesa irakurri dizut,

ihesean noakizu

itzulerako bidean,

zure ihesa pentsakizun:

adio esan ote zenuen, esan ote zizuten,

inork hartzen ote zaituen faltan,

atzera begiratu ote zenuen atea gurutzatzean

Itzulerako bidean

ihesa:

non hasi ote zen zurea,

amaitu ote den nirea