13. agerraldia

 

 

(aguazilak telefonoskypetik Herritarren Askatasunerako Segurtasun Batzordean gertatutakoa kontatuko die alkateari, prentsa-arduradunari eta mozkin jaunari.)

 

aguazila: Alkate jauna, gertaera larriak, oso larriak.

 

alkatea: Zehaztu hori.

 

aguazila: Geolokalizatzea itzaltzeagatik atxilotu dugunak makuluarekin buruan kolpe itzela eman dio hasbeko buruari.

 

alkatea: Buruan buruari? Zehaztu hori.

 

aguazila: Inork espero gabe, atso zaharrak bere makuluarekin burua erdibitu dio hasbeko buruari.

 

alkatea: Grabatu duzue? Erantzun, grabatuko zenuten, ezta?

 

mozkin: Lasaitu zaitez, gizona, eraikin publiko guztietan ditugu kamerak, batek ez bada besteak grabatuko zuen.

 

aguazila: Bai, noski, jauna, idazkariak grabatu du dena.

 

alkatea: Eta non dago bera?

 

aguazila: Nor?

 

alkatea: Zelan nor?! Zenbat nor daude hor? Nor izango da ba, nor!

 

aguazila: Burua galduta dago.

 

alkatea: Erasotzailea?

 

aguazila: hasbeko burua.

 

alkatea: Nor? Zehaztu haren egoera.

 

mozkin: Erasotzailea bizirik dagoen jakin behar dugu, jauna, hori da garrantzitsuena.

 

alkatea: hasbeko buruaren egoera baino? Zehaztu hori.

 

mozkin: Lasaitu gaitezen, jaunok, eta utz diezaiogun egoeraren azalpen osoa eman diezagun. Burua hotz eta patrika bero, lagunok, burua hotz.

 

aguazila: Atsoa atxilotuta eta aulki bati lotuta dago. hasbeko burua lurrean botata, konorterik gabe, idazkaria bideoa editatzen. Modus operandiagatik ondo entrenatutako aktibista dela esango nuke, jauna.

 

mozkin: Eta neska?

 

aguazila: Zein neska, jauna?

 

mozkin: Nahikari, atso zaharrarekin batera atxilotu duzuna.

 

aguazila: Han ez da neskarik gelditu.

 

alkatea: Zelan ez dagoela neskarik! Non dago ba?

 

mozkin: Neskatila lekutan dago honezkero. Alkate jauna, baimena ematen badidazu nire gizonei deituko diet.

 

aguazila: Ideia bikaina, Mozkin. Ondo deritzozu, ezta, Alkate jauna?

 

alkatea: Aurkituko dugu, ezingo du urrun joan, neskatila bat baino ez da. Oposizioak ez du ezer jakin behar.

 

aguazila: Jauna, zuk ez duzu oposiziorik.