1. agerraldia

 

 

(grisez jantzitako aktoreen koruak aulkiak kokatuko ditu oholtzan.)

 

aguazila: Entzun, Artekaleko herritarrok, entzun ondo. Herri honetako udalbatzak, zeina denok dakigunez herriko jakintsuenek osatzen duten eta, beraz, esaten dutena betetzeko modukoa den, agindu didate zuei jakinarazteko entzun dutela, antza, Estatuaren edo Osasunaren Mundu Erakundearen ikerketa bateko emaitzek diotenez, G8a osatzen duten munduko estatu aberatsenetako mandatariek, munduko biztanleon ongizatea arriskuan egon daitekeela-eta, eskatu ei zieten ez dakit zelango ikerketa bateko emaitzen arabera, jarlekuek, hau da, aulkiek, jesarlekuek, ipurdia sostengatzeko gailuek, ba, antza, diotenez, kalte egiten diote bizkarrezurrari, horregatik hirukoiztu ei da horrenbeste hernia dituztenen kopurua, nik ez dakit ziur, eta udalekoek, zuei hau esateko agindu didatenek, zehaztu didate zuei esateko oraindik ez dutela jakinarazpen ofizialik jaso eta, jakinarazpen ofizialik ez badago, ez dela existitzen. Benetakoa izateko, jakinarazpen ofiziala behar du. Bestela ezin da izan. Ba ze, klaro, jakinarazpen ofizial barik edozeinek esan lezake edozer eta horrek ez du balio. Baina zuek egon lasai, horixe argitzeko baino ez da izan. Laster izango ditugu albiste berriak. Egun ona pasa eta segi orain arte legez ederto bizitzen. Artekalen, 2036ko ekainaren 10ean.

 

auzokide 1: Barkatu, ez dakit ondo ulertu dizudan, zer esan duzu?

 

aguazila: Ejem, herrikide maite hori, badakizu jakin udalaren bandoak ez direla birritan esaten. Behin esaten dira, behin baino ez. Beharrezko informazioa Udalaren webgunean zein Twitter, Facebook, Instagram, edo Togetherkissing kontuetan aurki zenezake, Udalapp aplikazioa zure mugikorrera deskargatu, “Denokgarabat” Whatsapp taldera gehitu edo udaleko iragarki taulan goizeko 08:00etatik 08:12ra ikusgai dagoen Aldizkari Ofizialean kontsultatu.

 

auzokide 1: Bai, badakit, baina zer esan duzu esan duela udalak Osasunaren Mundu Erakundeak agindu duela, G8koei kasu egiteko?

 

auzokide 2: Ez, esan du, udalekoek G8koei eskatu dietela Osasunaren Mundu Erakundekoei agintzeko aulkiei buruzko ikerketa bat egin dezaten. Eta ni ados nago. Uste dut ezin dugula edozein aulki onartu.

 

auzokide 1: Zer? Gure etxeko jesarlekuak, umetatik ditugunak, gugaz horrenbeste ordu eman dituztenak, bota egin behar ditugula?

 

auzokide 2: Horixe.

 

auzokide 1: Bota? Nora bota? Zergatik bota?

 

auzokide 2: Txarto eginda dagozelako.

 

auzokide 3: Zer gertatzen da hemen?

 

auzokide 2: Pregoilaria etorri da esateko, antza, laster barru, besaulki berri bana oparituko digutela eta zaharrak albait arinen garbigunera botatzeko.

 

auzokide 3: Ze ordutan etorriko dira bila?

 

auzokide 1: Zeinen bila. Zein atxilotu behar dute ba!

 

auzokide 2: Norberak eroan behar dituela ulertu diot nik.

 

auzokide 3: A, Borondatezko Zerbitzu Publikoaren planaren ekintzetako bat izango da, orduan.

 

auzokide 2: Hori da, horixe bera esan du pregoilariak.

 

auzokide 3: Ze ona den Borondatezko Zerbitzu Publikoaren plana, joder, ze ona.

 

auzokide 2: Ba nik plan horregaz zalantzak ditut. Borondatezkoa eta publikoa ez dut uste uztartzekoak direnik.

 

auzokide 3: Ezagutzen duzu konpartibismoaren teoria? Publikoak konpartitzea eskatzen du eta konpartitzea borondatezkoa da beti eta, ondorioz, zerbitzu bat.

 

auzokide 2: Konpartitzeak borondatezkoa izan behar du, noski, ezin delako inor konpartitzera derrigortu.

 

auzokide 3: Horixe ba, horregatik gura dute gure jesarleku zaharrak bota eta denok berdina erostea, konpartitzeko.

 

auzokide 1: Orduan zer, gure etxeko aulki guztiak derrigorrez bota egin behar ditugu edo borondatezkoa da oraindik?

 

auzokide 2: Ez diozu entzun pregoilariari? Derrigorra dela, derrigorra!

 

auzokide 1: Ez, berba hori ez du esan.

 

auzokide 2: Esango ez zuen ba! Nik garbi-garbi entzun diot: de-rri-go-rra!

 

auzokide 1: Derrigorra ordez Ezinbestekoa izango balitz.

 

auzokide 3: Ez horixe! Alde makala dago ba Derrigorra izan edo Ezinbestekoa izan.

 

auzokide 2: Ez ba, Derrigorra rusoek erabiltzen dute eta Ezinbestekoa moroek. Konparatuko dituzu ruso bat eta moro bat!

 

auzokide 1: Amari deitu behar diot. Ama, entzun duzu jesarlekuena? Bai, zaharrak bota eta denontzako berri bat egingo dute. Derrigorra den? (Bere kolkorako) Holangorik, oraintxe enteratu naiz gure ama rusoa dela! Ama, zergatik ez didazu inoiz esan rusoa zarela? Zergatik diotsudan? Auzokide batek esan digulako Derrigorra berba rusoek baino ez dutela erabiltzen.

 

auzokide 2: Et, et, et, nik ez dut hori esan, nik esan dut Derrigorra berbaren R bikoitz horrek ETB Minus 1en ematen dituzten errusiarren pelikuletako aktoreak dakarzkidala akordura, ez besterik.

 

auzokide 1: Hori noiz esan duzu, gure amagaz berbetan nabilela? Ama, itxaron, asuntoa zehaztu egin behar dugu-eta. Bueno, gero deituko dizut. Derrigorra erabiltzen duena beti da rusoa edo izan daiteke batzuetan rusoa eta beste batzuetan ez.

 

auzokide 2: Horixe ez dakit nik.

 

auzokide 3: Nik hori, badaezpada, Borondatezko Zerbitzu Publikoaren Planeko teknikariren bati galdetuko nioke.

 

auzokide 2: Egizu hori eta kontatuko diguzu. Nik lanera joan behar dut, bosgarren erreleboa dut gaur eta berandu nabil. Gero arte.

 

auzokide 3: Bai, gero arte.

 

auzokide 1: Agur ba.