Edu eta Haizeren elkarrizketa
Panpina antzezlanaz

 

Edurne Mendizabal Tolosa eta
Haizea Egiguren Iriarte

Sexologian aditu-arituak eta feministak

Arremanitz kooperatibako kideak

 

edu: Aizan Haize, zer iruditu Panpina antzezlana?

haize: Ederra. Ez galdetu gehiegi, hala ere.

edu: Zer ba?

haize: Hiri ez al zain pasatzen antzerki bat ikustean dena harrapatu eta jaso nahi izatea? Niri bai. Eta horretan nabilela, harrapatu dudan erdia ere ahaztu egiten zaidan askotan beste erdiaren bila nabilelako.

edu: Gustatu zain antzerkia edo ez?

haize: Bai, esan dinat, asko! Ederra!

edu: Ez dun ondo ulertu eta ederra dun? Nola ulertzen da hori?

haize: Funtsean zerk egiten du antzerki bat ederra izatea? Ba niretzat beste guztiak bezala hire barruko zerbait ukitzeak, edo ez, eta nirea ukitu zinan!

edu: Barrua?

haize: Bai, barrua. Gorputza, burua, bihotza, alua…

edu: Kontxo! Bai barrura ere... Ba nik emozio koktela sentitu ninan.

haize: A, bai? Zeren koktela?

edu: Ausardia, kezka, beldurra, fantasia, erotismoa, gogoa, indarra…

haize: Hiri ere barrura iritsi zain orduan.

edu: Egia esan topera ikusi ninan Erika eszenario gainean, kulero zatar horiekin, mediak burutik behera sartuta zituela baina munduaren jabe, onenaren pare. Erabat erotikoa! “diva” !

haize: Bai, ala dun! Baina gogoeta bat, Edu. Erikak badin “diva” izateko moduko gorputza, aurpegia, espresioa... Ederra da, ezta?

edu: Ba bai, eta? Zein ez da ba ederra?

haize: Bai, Edu, hori oso polita geratzen dun hitzetan, denok garela ederrak. Baina publikoari ez zion inpresio berdina egiten holako gorputz eta aurpegi batek edo beste batek eszenario gainean. Diskriminatzailea, komentario eskasa… irudituko zain, ze halaxe dun. Baina egia dun! Inpaktu berdina sortzen din jendartean, edo ez?

haize: Hik nahi dunana esan, baina gorputzak anitzak ditun eta hortxe diten grazia. Oinarria betikoan zagon, jendartearen betaurrekoak aldatzea falta. Gorputz gazte, zahar, lodi, mehe, itsu, gogor, herren... bere ile, zelulitis eta dena delakoarekin. Inpaktua edo ez inpaktu, anitz! Garen bezala! Gorputzak adina sexualitate oholtza gainean! Hori dun dagoena! Haize, pasarte bat ekarri zidan gogora gogoeta honek. Guk behin strip-tease ikastaro bat egin geninan baserri batean. Mendiko arropa eta botak, elementu zein musika sujerente batekin norberak bere strip-teasea prestatu zinan. Ikaragarria izan zunan, han geunden guztiak ikusi geninan beste emakumeetan erotismoa, erakargarritasuna… Pasada bat izan zunan. Nola imajinatuko ninan nik piura hartatik hori ateratzerik zegoenik! Ba horixe, denongan dagoela erotismoa eta sentsualitatea.

haize: Bai, hori ere egia dun. Ederki atera zitzaionan gure “diva”ri ere bere itzala, e? Eskerrak barruko panpina paseatzera ateratzen dugun noizbehinka...

edu: Itzalak itzal! Baina ez esan ez dela ederra batzuetan “diva” sentsazio horrekin konektatzea.

haize: Bua! Bai, brutala dun, titiak ere puntan jartzen diren momentu hori! A! Eta alua buruan jantzi zuenean?

edu: Ze ona! Alua buruan eta ibili munduan!

haize: Imajinatzen al dun, kaletik ibiliko bagina buruak estalirik eta aluak agerian ditugula? Denak horren ezberdinak izanda, aluen bitartez ezagutuko geninan elkar!

edu: Ze elkarrizketa izango ote zitiztenan aluek? “Plost, plost, kaixo, zer moduz habil aspaldiko?”.

haize: “Plost, plost, ba aspaldi honetan oso katxondi. Heu?”.

edu: “Ni odolduta oraintxe. Ez didan ezertxo ere esan, ilea moztu dinat... Ondo, ezta? Oraingoan make yourself, ze pelukeria eta ze letxe!!!”.

haize: Kar-kar! Onaaaa, Edu! Hi, ba, berriz ere itzalarekin natorren ni, ezin dinat burutik kendu. Pertsonaiarekin asko identifikatu nindunan barne polizia ateratzen zitzaionean. Eta hi?

edu: Baita ere. Besteek pentsatuko dutenari beldurra... hor zagon norbere kartzela! Edertasun ereduak eta askatasun pertsonala, sexuala eta esango niken emakume moduan hazten gaituztenei bereziki. Espezialitatea besteentzat eder, egoki, zaintzaile izatean datzala. Erika Roiboosek horixe erakusten zigun, badakiela non dagoen bere kartzela hori eta hortik askatu daitekeela barrena, miseriak atera eta plazera bilatu, goxatu, eskandalizatu... hortik bere boterea.

haize: Batzuetan pentsatzen dinat ez ote den errazagoa jendartearen pentsamenduaren norabidean bizitzea, eta kito! Errazera!

edu: Edo ez… Hortxe zagon, asko eragingo zigun, noski. Hori onartzea zagokigun baina barruan dinagu bizitza, plazera, morboa, eszitazioa… dena! Ezin dinagu ukatu hori!

haize: Bai, barrura sartu behar, esploratu, arakatu, saltseatu, esperimentatu, baimendu eta ausartu behar! Eta batzuetan haizea hartzera bidali barruko polizia hori, aizan! Edo orain, bat-batean, poliziaren aldekoa bihurtu haiz? Gainera, asko praktika edo ideia immoralek, ilegalek, eszitatzen zituen...

edu: Adibidez?

haize: Ba... espazio publikoan norberarekin aritzea, ikusia ez ikusia izate horretan, adibidez. Edo besteei begira, haiek jakinda edo gabe. Edo adin zein gorpuzkera ezberdinetako emakume* batzuekin disfrutatzea. Edo objektuekin, jostailuekin, fetitxeekin... boterearekin jolastea, minarekin... Fantasia anitzak, Edu!

edu: Lehen aldiz larrutan egiten din bere itzalarekin. Toomaa!!!

haize: Poliziaren ideia ez zaidan gehiegi gustatzen, baina itzalarena gero eta gehiago. Pentsatzen jarrita… gure fantasia eta morboak ere ez al ditun itzaletik etortzen?

edu: Batzuk bai, behintzat, gure biografiarekin diten zerikusia eta itzalak hor badin lekua. Bistan ditugunak eta ez ditugunak.

haize: Hi, eta publiko aurrean masturbatzea? Zer mugitzen din horrek?

edu: Buuaaa!!! Lotsa, egonezina, subidoia, bizipoza, eszitazioa... denetik. Emakumeen artean gutxi hitz egiten dun masturbazioaz eta horrelako jarrerez, arte adierazpenak posible dela demostratzen din. Gogoa ematen din. Munduko emakumeak gure masturbazioez, fantasiez, gozamenez hitz egingo bagenu... benetako iraultza luken. Jabetze pertsonal eta kolektibo geraezina, Haize!

haize: Bai, uste dinat bizitzaren zentzu guztiak sentitzea, bizitzea tokatzen zaigula, argiak eta itzalak.

edu: Ausardiaren eskaileran koxka bat igoko dinagu eta elkar adoretu, babestu. Gorputzak, bizipenak, praktikak, desirak, eszitazioak, plazerak begiratzeko betaurrekoak eraldatzen ari gaitun. Ederki pasako dinagu, galtzekorik ez eta irabazteko dena. Goazeeen!!!

haize: Bengaa!!