Nirekin jolasteko

Koldo Almandoz

E. maitea,

      Ba al zenekien 4.000 urte baino gehiago duten panpinak topatu izan direla? Leize, tenplu eta zabor kontenedoreetan batez ere. Ai! Zer dira Miloko Venus edo Gioconda? Zer ama birjina eta itsas ontzietako branketako maskaroiak? Dirudienez, gizakia gizaki denetik da panpina panpin. Baina noiztik da panpina gizaki? Noiztik gizakia panpin?

      Egipto Zaharreko krokodilo panpinak. Elkar irensten duten Matrioxka errusiarrak. Bikingoen egurrezko oreinak. Euria erakartzeko Hopi herriaren Katxinak. Ai! Japoniako Kokeshi eleganteak. Indiako txotxongilo koloretsuak. Guatemalako Quitapenas xumeak. Bisque panpina germaniarrak. Made in China txinatar panpinak. Soltero despedidetako panpina puzgarriak. Namibiako Himba panpina gorriak. Ai! Paperezko panpinak. Arto hostoz eginiko Totomoxtleak. Portzelanazko Sissi enperatrizak. Haur ez jaioak diren Reborn panpinak. Ferietako tiropitxonean irabazitako pelutxeak. Madelmanak vs Geipermanak. Zakilarekin betetako galtzerdiak. Star Wars panpinak. Binilozko Toy panpina artistikoak. Silikonazko panpina maitaleak. Jaiotzetako panpina dekapitatuak. Lady Plush panpinak. Zeluloidezko Kewpieak. Autoetako parabrisasean lepoa mugitzen duten zakur panpinak. Ai! Barbie, eta ai! Ken…

      Jabetuko zinen honezkero, panpina hitza googleatzen ibili naizela. Katalogoa oso zabala da. 4.000 urtetan, panpina ugari eta anitzak sortu ditu gizakiak.

      Aiii!

      Azaldu beharko didazu noizbait, E. maitea, hainbesteren artean, nirekin jolasteko zergatik aukeratu duzun Vudu panpina…

                        Muxu bat

                        K.