TATUAJEA

tatuatu aurretik jadanik hor zegoela diost,

larruazalaren azpian, momentu egokiaren zain,

eta azkenean Barnako halako zapatu arratsalde batean

rumba erritmopean eta kosto usainez jaio zen

hori aitortu ostean harro erakutsi dit tatuajea,

ubarroi bat hegan olatuen gainetik,

eta hari begira geratu da une batez, isilik,

gerrian lotuta daukan pintore-buzo zikinaren gainean

zigarroaren errautsa jausi zaiola ohartu barik

ordutik, bere ubarroiaren itsasoak enbata asko nozitu ditu

eta enbata horietatik hainbat hondoratze lekuko,

itsasotik urrun zeuden ziegetan porturatuta,

lau urte eta hogeita bi egun,

badakik zenbat sexu galduta?, diost,

eta irribarreak agerian utzi dizkio

nikotinaz zikindutako hagin eskasak,

halakoxea duk bizitza, mareak bezalakoa,

itsasora irten eta zer topatuko jakin barik ibiliko haiz,

tatuajeak berriro harrapatu dio begirada

ubarroia izan gura nian, dio zigarroa ezpainetan,

olatuen gainetik libre, inolako muga barik,

han eta hemengo kalatxotan etzanda,

baina begira bizitza benetan zer den,

begira zer bihurtu garen...

moila zikineko ahate gatibu eta zaborjaleak

© Paddy Rekalde