JOE STRUMMER

                                                        Emancipate yourselves

                                                        from mental slavery

                                                              Redemption Song

Etorkizuna idatzi barik dagoela dio Joe Strummerrek

mikrofonoaren atzean telekasterra besarkatuz,

eta Woody Guthriek gitarran idatzita zeukan bezala,

This Machine Kills Fascists,

musikaren indarra aldarrikatzen du,

Pantera Beltz berrien rap eta hip-hopa

Boterea borrokatzeko punk-rocka

baztertuen kaleetan dabilen Dub Poetry lehergarri hori...

Joe Strummer izerditan, begiak bilduta,

Garcia Lorcari galdezka non ote dauden

gerra zibileko lubakietan bandera gorriaz jantzirik

hil ziren poeta internazionalistak,

Spanish Bombs eder haren erritmopean

Joe Strummer, irribarretsu baina sutan,

ghettoak matxina daitezen deika,

rebels calling! rebels calling! know your rights!

bafleek eztanda egiten duten bitartean,

This Is Radio Clash, Intxorta 37 Irratia

Joe Strummer, malkotan, telebistari begira

Rock The Casbah idatzita daramaten megabonbek

Ekialdeko hiri urrunetan triskantza ikaragarria

gupida barik zelan eragiten duten,

mass media nagusien prime time horren bazkarako,

Death is a Star

Joe Strummer, Public Enemy no.1,

matxinadarako poemak eta makien swing hori,

arrakasta errazaren zirkura joateko

eskatzen diote kritikariek etengabe,

borrokaren frontline horri bazter emateko

multinazionalen kaiolan jaguar distiratsu bihurturik

Baina Joek, sasipeko irratien uhinetatik

aldarri egiten du behin eta berriro

etorkizuna idatzi barik dagoela

© Paddy Rekalde