JIRAFA TIROKATUA

pubeko jabeak mesede egiten diola esan digu,

bere ohiko tximino harro ahotsaz,

Kolonbia epeletik etorritako halako neska batek

putetxe batean amaituko zuela bestela,

beraz, hobe bere negozioan, kale gorrian baino

ondoren, ron botilen alboan daukan argazkiari heldu

eta begirada distiratsuaz erakutsi digu

hauxe da, diosku, Fanny, 27 urte

hortxe dago Fanny, tximinoaren besoen artean,

honek behartutako "uniformea" jantzita:

errape ederrak tenkatzen dituen top horia,

short urdinkara eta takoi luzeko zapatak

bazterrotan, aizue, benetako mesedea egin diot,

diosku, kolonizatzailearen irribarre kristauaz,

besterik egiten ez dakitelako

denok dakigu soldata miserablea ordaintzen diola,

eta, itxi aurreko ordu txikietan, pattarrak harrotuta,

harroxko aitortzen du larrua jotzen diola

nahi adina aldiz atzeko biltegian

barra gainean utzitako argazkiari berriro erreparatuta

Afrikako oihan ederretara joan zait gogoa,

halako beste irudi bat sortu da nire begien aurrean:

jirafa tirokatua ehiztari zuriaren bota azpian

© Paddy Rekalde