SEINALEA
Seinale baten zain
eman genituen urteak,
eta azkenean gertatu zenean
inor ez zen enkontrura azaldu.
Alferrikako gutunen antzera igarotzen ziren
tranbiak, gorbatadun putreak eta bestelako piztiak,
alboetara begiratzen ez dutenen gisa
paseatzen ziren gure aurrean.
Enkontrurako geratutako izkinan,
inor ageri ez zen eremu hondatuan,
lagunak denboraren arrakaletan
barrena jausi ez ote diren pentsatuz,
ahaztutako oroitzapenen zokondoan
maite ditugunen izenak bilatuz
erlojuetako orratzak patriketan
nola ugertzen diren ikustera jesarri nintzen,
alderdi guztietara begira
geure buruak nondik azalduko ziren zain.
© Txili Lauzirika