KORRESPONDENTZIA
Erlojuetako orratzak lokartzen diren desorduotan,
oinazeak erditzen diren momentu honetan
ametsak bilin-balaunka arrosariotik eroriz,
hasperenak biziberritzen diren une laburrotan,
bihotz zirrikituak izkiriatzen dituzten ordu txikiotan
urtu egiten da ene gogoa zuk utzitako hutsunean.
Gurutzefikatuaren aldekoen malkoak ene masailetatik lerratzean,
gure ezpainak distantziaren izkinotan iltzatzean
isil-isilik sumatzen zaitut ene barrenean,
aspaldiko egunsenti gozoaren babesean
gure baitako ortzimugak marrazten ditugunean,
korrespondentziazko musu eta besarkada hauetan.
© Txili Lauzirika