Zeruan isurtzen dute goizero gernua

sekula ere iruditu gabeko piztiek,

muga harunzko monstru erraldoi basatiek

berpiztu egiten digute berton ifernua.

Errobot mekanikoen lantuzko doinua

jotzen dutela elektrotresna eriek

semaforo zuri, gorri, eta orlegiek

ezerezari egiten diote keinua

eta auto ihestutuei darien kedarra

ez ote Heriok bidaitzen digun zezenak

barne muinetan iltzaturiko adarra?

Tristura hauts ilunez estalita iraganak

neronen bizialdi artegatsu bakarra

irribarretsu itxaroten nauka azkenak.