Sollube urtarrilean

Itzuli egin dira hegaberak,

urtero legez haizearen erromes;

iparreko izotz krudeletatik ihes,

hegaletan, dantzan neguko banderak.

Berton behiola izaniko trintxerak

estaliak pinu eta otabarrez;

garai batetako hainbeste amets

ez ote sukarraldiko kimerak?

Inoizko urdinen Kantauri itsasoa;

urtzeke, zuri Soiluben elurrek;

sasitzan gordeta dabil sosoa.

Galdera larri horren erantzuna

ez dute inon be datzaten hezurrek:

geure eskutan dugu etorkizuna.