OGIA ETA EGUNKARIA

Gela honetan gordetzen naiz

neure neurrira argitutako

mundu aizunak sortzen

kanpoko mundua izanik ere

ispilu guztietan ispilu.

Beti igandea balitz bezala,

ogiarekin batera egunkaria

ekartzeko baino ez naiz irteten.

Kalea, jendea, herria, mundua

ukitu gabe neureganatzen ditut,

ferekak eta ukabilkadak,

musuak eta tiroak.

Egunkariak kale egiten du

kale izateko ahaleginean,

zuzenean bizitzeko nahian

huts egiten dudan bezala nik.

Ogia, kalea, bizitza,

jendea, herria, mundua.

Zer ote dira benetan?

Gero eta gela honetakoago nago,

ilunpean nire aproposko munduekin jolasean.