EZ LEHEN BEZAIN SUHAR

Zeres, Eris, Haumea,

Makemake, Orko,

Sedna, Varuna, Hi’iaka,

Namaka eta Quaoar

ezagunago eta minago

ditut 2006ko abuztuan,

nirekin kontsultatu gabe,

aurretik abisatzeke,

planeta handien multzotik

erauzi nindutenetik,

ni, Pluton, beti

haien artekoa izan nintzena,

zerrenda guztietan azkena

baina horrexegatik beragatik

bereziki gogoan hartua,

bereziki maitea.

Zeres, Eris, Haumea...

Haiei esker jarraitzen dut,

lehertu eta mila puskatan

desegin eta zatitu beharrean,

espazioan biraka,

ez lehen bezain suhar

baina etenik gabe,

arnasari arnasa emanez,

zaputzean bizirik,

ttirriki-ttarraka.

Eskolan, behiala, aspaldi,

planeta bat naizela ikasi

eta oraindik ere,

ezjakinean edo elkartasunez,

nostalgia hutsez bestela,

planetatzat, eta ez planetoidetzat,

nauzuen gehienonaren adinako

ttirriki-ttarrakan.