Etiketak hala dio:

% 100 kotoia, garbitu bereizirik.

Ez erabili lehorgailurik, ez lisatu.

MADE IN BANGLADESH.

Eskuetan dauzkat palankana

Chimbo xaboia, leungarria eta

umeen arropa.

Mahukak jaso eta uretan sartu ditut eskuak.

Bits zuriaren miraz eragin eta eragin

eskuak nasaitu eta estutu

arropa marruskatzen eta marruskatzen.

Ukondoak konketan hondoratuta

burbuilak sortu eta puskatuz

saiatu naiz besoak ur gero eta ilunagotik ateratzen.

Nolabaiteko hipnosi horretatik askatzen.

Eta orduan egin didate gainez

bular sudur begi zuloetatik

tintaz zikinduriko errekek.

Suge beltz pozoitsuak

barrutik hausten ari den etxetik ihes

kea, hautsa, porlana

goitik behera amiltzen.

Emakume baten bi esku ziren

bestaldetik tiraka nituenak.