Lehen semeaz erditu nintzenean

botila bat oparitu zidan amaginarrebak.

Gran Vino Sansón.

Bere amaginarrebak erregalatu zion berbera.

Egongelan kristalarentzako armairuan

hogeita hamar urte eta gehiago gordeta izan zuena.

Hasieran ez nuen mezua ondo ulertu.

Ezagutu ez nuen sei seme-alabaren amandrea

asmatzen nuen baserrian

lan egun gogor baten ostean

suaren ondoan barrua berotzen:

Ongi etorri amen erreinura.

Hemen naukazu behar nauzunerako.

Esan nahi ote zidan

bizitzak berak emango zidala zer edana

ardo goxoa bezain bero eztarrian behera

hitzak oihuak aieneak lurruntzeko?

Vino rancio viejo aromatizado

preparado especialmente para

Bodegas de la Victoria S.A.

Botilan pilatutako hautsetan utzi nuen

ama izan osteko lehen hatz marka.