I

 

umea sehaskan

izara zimurrak

esne tanta

esne putzu

esne urmaelak

lurrean

oinatzak

hatz markak

nondik ibili naizen

ezin ezkutatu

animalia harrapariari

 

arropa eskegita

etxe barruan

galderekin erori dira

pintzak zorura

harraskan heze

bandera zuria

izan nahi duen trapua

zikinegi

 

amoniakoa, lixiba

euria entzuten dut nigan

elkarren kontra atzamarrak

alferrikako guda batean

burua altxatzen dut

ispiluan emakume bat

ez nau ezagutu

zapia pasatu diot

aurpegitik amultsuki

bizkarra emateko

behin eta berriz

 

 

          II

 

bi limoi erdi

beirazko erretiluan

elkarren kontra

zainak agerian

usaintzen lizuntzen

lehortzen

nire bi bularrak

 

 

                III

 

arraina atera dut hozkailutik

haren begien zirkuluan itsasoa

salto egin nahi nuke

negua bezain biluzik

ur garden horietara

 

 

                    IV

 

perrexil eta limoi lurrina dakar goizak

labea itzali berri, beroa jariatzen

sorbalda gainean ukitu bat

bizkarra eman diodan emakumea da:

utzi hezurrak miazkatzeari

umeen bila joateko ordua da

 

 

             V

 

fruta eta loreak erosi

nirekin batera

nola maskaltzen diren ikusi