Gainezka dagoen urontzia

banintz bezala hautsi nintzen.

Eta ospitaleko gela urez betetzen

eta betetzen.

Eskafandra bat ekarri zidaten

bonbona eta aletak.

Urpean arnasa hartzen ikasi behar duzu.

Ezkata zahar batzuk nituen gordeta

umea neu nintzenekoak;

ez ahazteko

itsasoari beldurra kentzeko

bizkarrean kolpe leun batez

haitzetatik uretara bota ninduten hartaz.

Begiak zarratu nituen

orduko hartan legetxe.

Eta zabaltzean

ozeano berri batek

irentsia nindukan.

Nori ez zaio gorputza inarrosten

ura arnastean.

Egarri berri horrek

esnatzen nau orain gauero.

Itsasoz betetako edalontzia

ohe ondoan.