IRAGAN ZURBILAREN
BALADA BARREGARRIA

zer ote dauka?

zergatik ez datorkio berorik masailetara?

lotsa ote da gorritasunak erakusten?

zergatik ote da hain zainik gabea?

berak ere ez daki

odolik gabekoa da gure iragan zurbila

bisitatu ditu sendagile naturistak

eta turista handi hauek

alpeetara bidali dute ur bila

bisitatu ditu ezkerreko organoaren adituak

eta odolmindu handi hauek

sortu diote sekulako zurrunbila

bisitatu ditu akupunturatzaileak

eta akuilatzaile handi hauek

sartu diote arrain gezur pila

bisitatu ditu psikoanalistak

eta zurrupakari handi hauek

galdetu diote bere iragan zurruna

orduan iragan zurbila

zuhurtzia galdurik zurrusta batean hasi da

elerik maiuskulenak jaulkitzen

labezomorro labirinto laido laino larru laztan

leize leun lerden

psikoanalista zurrutalarienek ere

ulertu ezin dioten zurrumurruan

harik eta iragan zurbila pazienteak

liburu!

esan behar zuelarik psikoanalisten ugazaba

libido! hotsean lehertu den arte

bere diagnostikoa emanez

kalera jaitsi dira iragan zurbila

eta psikoanalisten gabinete osoa

pazientearen zurbiltasuna

zurrutaldi on batek sendatuko duelakoan

baina ez dituzte dosiak kontrolatu

atzendu dira iragan zurbilaz

atzendu dira iragan zurrunaz

eta beren orainaldi lurrunaz

hasi dira gogoaren putzulari

zintz eta zotin, zintzarri zurrunbada belarri betekoan

gobernu goibel gomendio gomuta gonatxo gordin

harik eta psikoanalistaren batek gorri! esan ez dezan

iragan zurbila pazientea

gozamen! hotsean lehertu den arte

inork topa egin ez dion kopa jasoz

gozamen!

errepikatu du iragan zurbilak zurtuz

gozamen!

orpo-behatzez markatu du zurrumadantza

nolako plaza oraintxe gaztelu plaza

jauzi eta balantza aldatu zaio karantza

aldatu zaio karantza baina psikoanalistek ez ikusi antza

iragan zurbilaren ikara

produce of scotland hodei batek dauzka eznorantza

iruñean, lupeko parking baten sabai gainean datza

iragan zurbila burua eskuetan gorderik

ez da hila

bere odolaren lotsa da hotza nahi du masailetara

zer egin dut! dantza! dantza egin dut!

ez du gorritasunik nahi

izua iduri izan behar du zuri bezain beluri

iragan bat dauka eta ezin dio egin itzuri

orain badaki

zer zoramen zer aztoramen

gorritasun hartan

gaztetan, behin, zer gozamen, odolbero baztanen