Parisen bizi naiz
Parisen bizi naiz
2013, poesia
144 orrialde
978-84-92468-48-5
azala: Kepa Gonzalez
Koldo Izagirre
1953, Altza-Antxo
 
2016, narrazioak
2015, nobela
2011, nobela
2010, saiakera
2009, nobela
2006, poesia
2006, kantuak
2005, narrazioak
1998, nobela
1998, kronika
1997, poesia
1996, erreportaia
1995, kronika
1989, poesia
1987, ipuinak
 

 

ERROMANTIKO BERANTIARRA

 

ongi etorri hilezkorren hilobira

sartu, sartu beldurrik gabe

egiaren bila zatozen hori

erantzi itzazu begiak

pausa ezazu eskua horma izoztuotan

hemen ez daukagu teologorik

ziurtatu zidan atalaurreko muskerrak

 

deabruak itxaroteko eskatzen dit

laster emanen dugula

erroma errautsetan estaliko duen meza

baina aspertua nago

hegalok alferrik eramaten

beiradura horiek apurtu ordez

aitortu zidan erretaulako sugeak

 

utopia zuhurrak besterik ez ditu maite

ez egin jaramonik iparrari

jarrai dezala zorroztasuna mozten

har ezazu isiltasuna aholku

hautsaren matxinadaren zain egon gabe

aholkatu zidan kapiteleko arranoak

bere arrainbuztan biribildutik mintzo

 

entzun izarren higidura

badator tristuraren eklipse osoa

eguerdiak eta gauerdiak bat eginen duten unea

elkar maite dutenek

maitatu ahal izanen dutena

xuxurlatu zidan ponteko apoak

beldurgarria izanen da hobe duzu hemen

hemen ez da mundua sartuko

 

eta hi, zer izanen haiz hi orduan

zatiaren eskeko

altxorraren lurperatzaile

parabola berrienen sinesle

zer zer zer

egin zidaten zaunka hegaleko zakurrek

 

hoa hemendik

harrizkoak sortzen dituen haizean

barrezka ulu kanpandorreko urubiak